БАТУКАЕВ АХЬМАДДУКЪ-ХЬАЬЖА

Тайпана  курчало  хилла  иза,  накъшбандин тIарикъатехь а волуш. Вайн махкахь дуьххьара алссам ийман диллийтина волчу Берса-шайхан тIаьхьенах  ву  Ахьмаддукъ-Хьаьжа.  Лаха-Неврерчу  Iусман-Хьаьжас  кхиийна  хилла иза.  Цуьнгарчу  Iилманах,  тIарикъатан  некъах пайдаэцна Ахьмаддукъ-Хьаьжас.

БоргIанерчу Iабдуллаб-Хьаьжин мурид хилла иза. Цуьнга шайхалла делларг и ву бохуш, чIагIдо цуьнан муридаша. Ткъа цо иза схьаэцнера йезачу Мединатерчу шайхера Мухьмад Матзарера. Иштта йу оцу шайхийн накъшбандин тIарикъатан зIе.

Дала  хиндерг  хаар  шега  делла  хилла  Ахьмаддукъ-Хьаьжа.  Iусман-Хьаьжа  дIаваьллачу буса  хьеший  хилла  Ахьмаддукъ-Хьаьжа  волчохь.  Iуьйра-ламаз дина ваьлча, хьеший  самабаьхна цуо.

–  ГIовттий,  сиха  лелалаш, Неврера  Хьаьжа дIаваьлла шуна, – аьлла цо.

– Мила веана хаам бан? – хаьттина цхьамма.

–  Веана  стаг  вац,  гIенах  цуьнан  са  стигала хьаладоьдуш гира суна. Цунах хаьа суна и бакъ хилар,

– элира Ахьмаддукъ-Хьажас

ХIорш, кечамбина, новкъа бевлча, дуьхьалкхеттачу стага и хаам беана кхаьрга.

Иштта бу оцу эвлайаийн белхаш, хила доллучу хIуманна синош тIекхуьуш.

Шайхан  Ахьмаддукъ-Хьаьжин  муридаш  бу дуккха а йарташкахь. Дела везаре, вовшашца магаре, исламан динехь нисдаларе кхайкхина цо шен хьехамашца. 

Дела хьехор алсамдаккхийта, вирдаш тIедехкина оцу устаза ша къобалвинчу муридашна.

Муридаша  зерат  дина  цуьнан  коша  тIехь. ТIехьа-Мартан кIоштарчу ШаIми-Йуьртахь ду иза. Бусалба динан дезачу деношкахь дуккха а нах хуьлу цигахь, Деле дерриге а диканиг доьхуш, доIанаш деш.

Дала къобалдойла церан зерат! Дала жоп лойла бусалба наха дехначунна!

М. Заурбеков